Ka Ọ Dị Taa

ỤFỌDỤ ụmụnwaanyị nọrọ na nsonso a wee mee ngagharịiwe n’Awka bụ isi obodo steeti Anambra, bànyere ajọ ọnọdụ nchekwa ahụ na-arị ibe ya elu na mpaghara ebe dị iche iche n’ala Nigeria ugbua.   Ọ bụ ngalaba ụmụnwaanyị nke òtù nkịtị a maara dịka ‘Igbos for a Progressive Nigeria (IPAN)’ mere ngagharịiwe a, ma bụrụkwa nke ha mere na mpaghara ụzọ Amawbia dị n’okpuru ọchịchị ime obodo ‘Awka South’, ebe ha nọrọ wee katọọ igbusi mmadụ, nsogbu ajọ ọnọdụ nchekwa, nà imemìlà ndụ ụmụ mmadụ aka ha dị ọcha ma na steeti ahụ ma na mpaghara ebe dị iche iche.   N’okwu ya oge ha na-eme ngagharịiwe ahụ, onye ndu ngalaba ụmụnwaanyị n’òtù IPAN, bụ Oriakụ Juliet Ezenwosu mèrè ka a mara na ya bụ nsogbu ajọ ọnọdụ nchekwa na-echuzị ha ụra ma na-agbazịkwa anyammiri, bụ nke mere ha jiri hụta ya dịka ihe dị mkpà, ịtụnye ụtụ nke ha na olu nke ha iji wèta ya bụ ajọ ọnọdụ na njedobe.   O jikwazịrị aha òtù ahụ wee kpọọ òkù ma rịọ ndị dị iche iche e ji okwu ha agba ìzù, ndịisi ụlọọrụ nchekwa dị iche iche na ndị ọzọ ọnụ na

IGBO sị na ọ na-abụ a sụchaa akwụ, a saghị ikwè, ọ dị ka a ka na-asụ ọzọ. N’ịgbasò nke a, ndị ntorobịa steeti Anambra pụtara nnọọ n’ùju wee kpochasịa gburugburu Awka bụ isi obodo steeti ahụ, iji debe ya ọcha, bụ nke e metọsịrị emetọsị oge ahụ ndị ntorobịa mere ngagharịiwe na nsonso a na mpaghara ebe dị iche iche. Ngagharịiwe ahụ nke ndị ntorobịa na-emebu n’ụzọ udo, wee ruo oge ndị omekóòme wèghààrà ya ma sizie na ya na-ebibi ọtụtụ ihe ma na-agbakwa ụkwụ ụgbọala bụ tayà na ụfọdụ ihe ndị ọzọ ọkụ, ma n’okporo ụzọ ma na mpaghara ebe ndị ọzọ dị iche iche, bụzị nke mere ka gburugburu ebe niile ruo unyi ma dịkwa njọ n’anya. Ọ bụzị ihe ndị ahụ a gbara ọkụ ka ndị ntorobịa a pụtàrà wee kpochasịa, iji dobekwa Awka ọcha ọzọ ma mekwa ka ọ chawapụ, dịka isi obodo ọ bụ. Atụmatụ mkpocha na nzàcha ahụ, nke a kpọrọ (n’Igbo) ‘Ka Anyị Kpochaa Awka’ bụ nke a tụpụtàrà site n’aka ụlọọrụ ‘Tripple Three Media’ na njikọaka ndị ntorobịa steeti ahụ. A malitèrè ya bụ mkpocha na nzacha n’ama egwuregwu Alex Ekwueme